24 қаңтарда университетіміздің студенттері №20 қалалық кітапханада «Казахстанская правда» газетінің 105 жылдығына арналған «Халық үні» атты танымдық дәріске қатысты.
Спикерлер газеттің тарихы туралы баяндайды деп күтілгенімен, олар әлдеқайда маңызды нәрсемен – тәжірибелерімен бөлісті. Қазақстан Журналистер одағының мүшесі Меруерт Маулетқызы мен «Казахстанская правда» газетінің журналисі Дина Устиненконың қысқа кіріспе сөзінен кейін дәріс пікірталасқа ұласты. Пікірталас барысында болашақ журналистер мен PR мамандары медиа саласындағы өзекті мәселелер мен перспективаларды талқылады.
Ең алдымен, Дина Устиненко «Казахстанская правда» – елдің негізгі газеттерінің бірі екенін және шынайы ақпарат ұсынатынын атап өтті. Редакцияның басты мақсаты – коммерциялық пайда емес, халықты ақпараттандыру, сондай-ақ позитивті және негативті жаңалықтардың арасындағы тепе-теңдікті сақтау. Журналистің пікірінше, елдегі өмірдің тек теріс жақтарын көрсету қоғамға зиянын тигізіп, артық дүрбелең тудыруы мүмкін. Оның орнына, өзгелерге мотивация беретін шабыттандырушы тұлғалар туралы айту маңызды.
25 жылдық тәжірибесі бар Дина Устиненко баспасөзде жұмыс істеуді кез келген әмбебап медиа маманы үшін негізгі міндет деп санады. Газет бетінде жарияланған материалдар арқылы теледидарға бейімделу әлдеқайда оңай. Ал экрандағы көрініске дағдыланған адам болған оқиғаны дәл сипаттай алмауы мүмкін. Дина студент кезінде оқытушысы Олег Квятковскийдің оны репортаж жазуға жібергенін еске алды. Жұмысына мақтанып, материалды тапсырған кезде, мақтау естудің орнына: «Өзеннің иісін сезбей тұрмын» деген жауап алған. Бұл болмашы нәрсе сияқты көрінгенімен, шын мәнінде, оқырмандарды оқиға ортасына алып баратын көптеген ұсақ-түйектерден құралған толық суреттің ажырамас бөлігі.
Талқылауда технология дәуірінің сынақтары да қозғалды. Әлеуметтік желілер адамдардың назарын шашыраңқы етіп, оны ұстауды қиындатып жіберді. Әсіресе TikTok пен Instagram желілеріндегі қысқа бейнероликтердің жылдам дофаминдік әсері жағдайында бұл қиын. Осыған байланысты «Казахстанская правда» дабыралы тақырыптар арқылы аудиторияны көптеп тартуға тырыспайды. Оның орнына редакция сапалы және объективті ақпарат арқылы ойлай алатын, интеллектуалды оқырман тәрбиелеуге көңіл бөледі.
Келесі спикер – фототілші Юрий Беккер – журналист пен фототілшінің үйлесімді жұмысының маңыздылығы туралы сөз қозғады. Тек Дина Устиненко сияқты әріптеспен тандемде ғана шынайы үздік жұмыстар жасауға болатынын атап өтті. Мәтін секілді, визуалды мазмұн да маңызды.
Дәріс соңында студенттер шабытқа толы болды. Олар тек пайдалы кеңестер ғана емес, өз ісіне кәсіби көзқарастың жарқын мысалдарын алды. Ең маңыздысы – батылдық және өз-өзіңнен асып түсе білу. Ал сапалы мәтін жасау үшін бұрын ешкім айтпаған тақырыпты қозғау немесе таныс тақырыптарды жаңа, бірегей тәсілмен ұсыну қажет.
Дәріс жас журналистер үшін өте пайдалы болды. Ол «Казахстанская правда» газеті туралы спикерлердің монологымен ғана шектелмей, шабыттандыратын шеберлік сабағына айналды. Болашақта студенттер осындай шараларға жиі қатысып, өз мамандықтарымен жақынырақ танысады деп үміттенеміз.
.png)
